Nuachtlitir 31 – Cúrsaí Poncaíochta

Aoine Shona, a aistritheoirí! Fáilte ar ais chuig Nuachtlitir na hAoine le STAR. Inniu, táimid chun díriú ar chúrsaí poncaíochta. Is ábhar é a chuireann mearbhall ar go leor dínn. Ar ámharaí an tsaoil, tá treoir iontach le fáil in Gramadach Gan Stró. Bíonn a stíl féin ag daoine éagsúla ach má bhíonn deacrachtaí agat le cúrsaí poncaíochta, d’fhéadfadh an méid thíos a bheith ina chabhair duit:

Lánstad:

1. Go hiondúil, ní chuirtear lánstad le nod. Is nod é leagan giorraithe d’fhocal atá comhdhéanta de chéad litir agus litir dheireanach an fhocail:

an Dr Seán Ó Bhroin

an tSr Bríd

2. Ní bhíonn lánstad tar éis acrainmneacha:

Imreoirí CLG

3. Cuirtear lánstad tar éis foirceannán (i.e. focail a bhfuil an deireadh gearrtha díobh).

Co. na Mí

An tOll. Pól Ó Sé

Spásáil:

1. Bíonn spás amháin tar éis na nithe seo a leanas: , . : ? !

2. Bíonn spás amháin roimh – agus ina diaidh:

Bhí an bhean álainn – a bhí 21 bliain d’aois ag an am – díreach tar éis pósadh.

3. Ní bhíonn spás ar bith roimh nó i ndiaidh /.

Camóg:

1. Úsáidtear camóg tar éis réamhfhrásaí:

Nuair a chríochnaigh mé leis an obair, chuaigh mé amach i gcomhair béile.

2. Úsáidtear dhá chamóg i lár abairte sa chás go bhfuil clásal nó frása i gceist nach bhfuil riachtanach chun ciall a bhaint amach as an abairt:

Beidh Liam, atá ina mhúinteoir, ag bogadh go Baile Átha Cliath.

3. Ní úsáidtear camóga atá riachtanach do bhrí abairte:

Tá an bronntanas a fuair mé go hálainn ar fad.

4. Cuirtear camóg idir míreanna i liosta ach ní chuirtear camóg roimh agus, nó, ná ná.

5. Úsáidtear camóga idir áitainmneacha, laethanta agus dátaí agus teidil a théann le hainmneacha:

Beidh an cheolchoirm ar siúl Dé Sathairn, an 12 Iúil 2024.

Beidh Helen McEntee, TD, i láthair ag an ócáid.

6. Ní bhíonn gá le camóg nuair a thagann an mhí agus an bhliain le chéile in abairt:

Beidh an bóthar dúnta ó mhí na Samhna 2024 ar aghaidh.

7. Úsáidtear camóg roimh chomhartha athfhriotail:

“D’éirigh liom,” a dúirt sé, “an chéim a bhaint amach.

Molaim daoibh súil a chaitheamh ar na leideanna eile atá le fáil in Gramadach Gan Stró. Tá treoir stíle foilsithe ag An Gúm freisin.